– Eg hadde akkurat gått inn for å vaske golvet medan borna leika utanfor. Då høyrde eg ein høg lyd utanfor. Eg kasta frå meg vaskekosten og sprang ut for å redde borna frå kva det enn var som skjedde. Så var dette synet som møtte meg, seier Julia Bjørkedal.

Like ved husveggen hennar stod ein bil på skrå med bakenden ned mot bakken. Borna hadde heldigvis leika i andre enden av hagen. Ho er svært letta over at det gjekk bra, men har lenge frykta at bilar skulle køyre av vegen i den bratte og smale Skogvegen.

– Vi har søkt kommunen mange gongar om å få ei sikring. Dei har vore her og teke bilete og vurdert situasjonen, men har ikkje prioritert å gjere noko. Kvar vinter dei fem åra vi har budd her har vi mast på kommunen, for vi har vore redd for at noko slikt skulle skje. No håper eg dei prioriterer å gjere noko, for det bur mange born her i området, seier Bjørkedal.

Naboen Alf Inge Roth er samd med Bjørkedal om at vegkanten må sikrast med autovern.

– Vi har etterlyst det sidan vi flytta hit. Det er fort gjort at noko slikt skal skje når det er glatt på vegen. Vi har eigentleg berre venta på det.

Ifølgje politiet skjedde utforkøyringa som følgje av eit uhell ved rygging. Føraren, ein eldre mann, har forklart at foten glei av bremsa og bort på gassen. Dermed for bilen utfor skrenten like bak. Bilen glei sakte utfor, så mannen vart ikkje skadd i ulykka. Politiet har teke rutinemessig beslag i førarkortet. Det er ikkje mistanke om promillekøyring