Det skriv bransjeorganisasjonen Norsk takst i ei pressemelding,

Seljar kan ikkje lenger ta atterhald om at bustaden «blir selt som han er», men må dokumentere tilstanden. Kjøpar kan dermed heller ikkje klage på forhold det er opplyst om i takstrapport eller salsoppgåve.

Formålet med dei nye føresegnene var å gjere bustadhandelen tryggare og redusere talet på konfliktar.

Etter at endringane tredde i kraft, viser ei ny måling utført av Yougov for bransjeorganisasjonen Norsk takst at folk flest er godt fornøgde med reglane. 65 prosent meiner føresegnene har gjort det tryggare å kjøpe brukt bustad.

– Det har elles vore interessant å registrere at fleirtalet meiner begge partar har fordel av dei skjerpa føresegnene, seier Daniel Ø. Helgesen, administrerande direktør i Norsk takst.

Eit klart fleirtal meiner også at risikoen for å kjøpe ein bustad med skjulte feil og manglar er reduserte.

– Dei nye reglane gir ei sterk drivkraft for seljarar til å gi meir og betre informasjon om bustaden i forkant, mellom anna ved å innhente grundige tilstandsrapportar laga av kompetente takstingeniørar, seier Helgesen.

(©NPK)