– Eg var aleine bergensar blant alle møringane på ein konferanse i Fiskebåtredernes Forbund. Det enda i eit veddemål, fortel Lie, som er skipper på ein ringnotbot og styreleiar i Vest Norges Rederiforening.

Fem mil om dagen

På konferansen hetsa møringane Brann, og Lie beit på kroken. Ting utarta seg, og til slutt var veddemålet opplese og vedteke. Dersom Brann ikkje slo Hødd i semien og tok seg til finalen i cupen, så skulle Lie gå frå Bergen til Ålesund. Hødd tok cupsigeren, så den historia er kjend. Laurdag starta Lie turen frå Bergen, til fots. Torsdag nådde han Volda.

– Dei første fire dagane var dei verste dagane i mitt liv. Alt var vondt. Eg er under middels sprek, og er heilt klart ikkje nokon langdistanseutøvar, fortel Lie.

Han har nådd Furene, og der ventar kona Beate med bubilen. Den fungerer som følgjebil, og tek Lie gjennom tunnelane.

50 kilometer per dag har han lagt bak seg. Torsdag var siste innspurt, via Hødd-land til Hareid og med snøggbåt til Ålesund.

– Men eg skal ikkje innom Høddvoll, nei.

– Glad det ikkje var Tromsø

Men Lie har ikkje gått aleine. To gode kameratar har slått følgje på vegen. Jan Inge Haagensen og Bjørn Arne Ofstad visste nok ikkje heilt kva dei gjekk til. Dei to slo følgje for å få eit avstressande avbrekk frå kvardagen. Ofstad fortel at han trudde han ville bruke mykje av tida langs vegen på å gruble og tenke.

– Men eg har berre tenkt på å gå. Ein fot framfor den andre. Og det har gjort vondt store delar av turen.

– Og så har vi treft godt med sesongen for bøndene. God skitlukt heile vegen, seier Haagensen.

Så dei store kjenslene har dei altså ikkje delt undervegs.

– Eg er berre glad for at det ikkje var Tromsø veddemålet handla om, seier Lie.

Og ein ny tur har han ikkje trua på. Ikkje kameratane heller.

– No taper vi kjeften på han. Vi følgjer han ikkje ein gong til.

Torsdag kveld nådde følgjet Ålesund, og vart vel tekne i mot av vinnarane av veddemålet.