I 30 år har det vore geologiforeining i Volda/Ørsta. Det var Sigvald Gjerde og Sigmund Hoggen som i si tid starta dette arbeidet.
I Krystallposten nr. 2 november 1992 (klubben si eiga avis) les vi dette om oppstarten av Volda og Ørsta geologforeining:
«Kvar for seg hadde Sigvald Gjerde og Sigmund Hoggen, begge voldingar, sysla med samling av pene eller sjeldne steinar. Førstnemnde gjekk vidare med stein som råvare, saga til emne, slipte og polerte til smykke, suvenir, pynte- og bruksting. Saman med kona dreiv han forretning i Volda sentrum med hobby-, gåve- og husflidsartiklar, også med stein for samlarar. Sigmund Hoggen, som tenkte på å melde seg inn i Ålesund og Omegn Geologiforening, gjekk no saman med Sigvald om å ta initiativet til å skipe ei slik foreining i Volda».
Det første styret
I8.11.1982 var det skipingsmøte og 15–20 personar møtte. Interimsstyret besto av Christofer Bang, Einar Russenes, Geir Øye og Aashild Driveklepp. I det første ordinære styret sat Sigvald Gjerde (leiar), Christofer Bang (nestleiar), Aashild Driveklepp (kasserar) og Roald Busch (sekretær). Dei andre styremedlemmene var: Einar Russenes, Ove Arne Strømmen, Svanhild Løvoll og Olav Grevsnes.
Lærarhøgskulen
Etter jubileumsmiddagen tysdag fekk vi samla nokre sentrale personar til ein prat om klubben. Det var mellom anna dagens leiar Ivar Tangen frå Larsnes, Inger Årflot, Aashild Driveklepp (den første kasseraren), Geir Halkjelsvik (kasserar gjennom 25 år) og ein av initiativtakarane, Sigvald Gjerde på 88 år.
– Kan de fortelje litt om oppstarten?
– Ja. lektorane Einar Russenes og Christofer Bang, som arbeidde ved Volda Lærarhøgskule, var viktige ressurspersonar for klubben den første tida, seier Aashild Driveklepp.
I byrjinga fekk klubben halde til gratis på naturfagavdelinga ved Lærarhøgskulen.
Mange nemnder
I Krystallposten les vi at dei i 1992 hadde ein svært stor aktivitet med nemnder for det meste slik som: Turnemnd, Stipendnemnd, Biletearkivar, nemnd for stein-samling/utstilling ved Volda Lærarhøgskule og nemnd for Steinutstillinga i ventehallen ved Ørsta-Volda lufthamn.
– Eg har i alle år vore med i redaksjonen for medlemsbladet "Krystallposten", fortel Inger Årflot.
– I tillegg til utstillingar både her og der hadde vi kurs i steinsliping. Og vi var mykje rundt på skulebesøk, seier Aashild som fortel at mediestudentane ved Distriktshøgskulen eit år laga ei reportasje heime hos henne som vert sendt på Nærsynet.
– Mange skuleklasser har vore heime hos meg for å sjå på steinsamlinga mi, seier Inger.
På det meste hadde klubben 100 medlemmer. No er det 50 som er med. Dei møtes ein gong i månaden.
Den røde rubin
I tillegg til medlemsmøta og opne møte, arrangerer klubben turar.
– Vi har vore over alt i området, seier Aashild og ramsar opp det eine turmålet etter det andre mellom anna Hjortedalen i Hornindal, til Steinbutikken på Lom, Åheim og Valldal.
– Men vi treng ikkje å reise utanfor Volda for å finne den røde rubin, seier Geir Halkjelsvik løyndomsfullt.
Gjengen fortel vidare om eit svært godt miljø.
– Det sosiale er ein viktig del av arbeidet. Her møter vi andre "steingalne", seier Inger og Geir.
Leiaren frå Larsnes kom med i klubben for eit par år sidan.
– Eg møtte opp på eit ope møte, og sidan eg var litt pratesalig kom eg raskt inn i miljøet og i styret, seier Ivar.
Inntekter
– Korleis har de skaffa pengar til foreininga?
– Vi har selt lodd og kaffi på møta. Og av og til har vi selt stein og steinprodukt. Ein gong hadde vi marknad i ei bilforretning i Volda og fekk inn 7000 kroner mellom anna ved å selje steintroll, minnest Aashild.
Den første tida køyrde dei sjølv rundt med møteinnkallinga, for å spare pengar.
No er klubben på flyttefot. Frå Sanitetshuset til Øyra skule. Med på flyttelasset er slipeutstyret også.
– Det passar godt å ha dette utstyret på ein skule, slik at den yngre garde kan få interesse for stein og geologi, seier Sigvald.