Start allergibehandlinga tidleg i år!

Over ein million nordmenn brukte allergimedisin i fjor. Koronaviruset kan ha mange av dei same symptoma som vanlege allergiar, derfor er det viktig å starte behandlinga tidleg.   Foto: Illustrasjonsfoto: Sara Johannessen Meek / NTB / NPK

Nyheiter

Våren er høgsesong for allergikarar. Med høg koronasmitte, med liknande symptom som allergi, er det viktig å behandle allergien riktig, seier Apotekforeningen.

Ein bør starte allergibehandlinga når ein merkar symptoma, og aller helst før sesongen startar, meiner fagdirektør Hanne Andresen i Apotekforeningen.

– Pollenallergi er ein folkesjukdom som rammar veldig mange. Over éin million nordmenn brukte allergimedisin i fjor. Spesielt var juni ein krevjande periode, der veldig mange henta ut allergimidlar frå apotek, fortel Andresen.

Pollenallergi og covid-19 kan ha symptom som liknar kvarandre. Plager i luftvegane er ikkje uvanleg ved allergi, og det er òg eit typisk trekk ved covid-19. Det å bli tungpusta, hoste og hovudverk kan òg komme av allergi, men er litt meir sjeldan.

– Viss ein behandlar allergiar i tide, vil ein redusere plagene og symptoma som kan likne på koronaviruset. Då er sjansen mindre for å forveksle dei to, seier ho.