Ny skiserie frå Ranglefant

Kva er det som driv menneske til å vere i fjellet?

Nyheiter

Søndag er det førpremiere på den nye skiserien "Glæder" på Volda kino. Det er det Volda-baserte produksjonsselskapet Ranglefant som står bak serien.

Molladalen: På tur i Molladalen.  Foto: Anders Vesterg/Ranglefant

– Vi følgjer Petter Westgaard. Draumen hans er å optimalisere kvardagen slik at han kan leve av og for skikøyring. Han ønsker å bruke mest mogleg tid i fjellet. I utgangspunktet er han ein god gammaldags skiboms, men på ein meir berekraftig måte, seier Matias Myklebust i Ranglefant.

I serien møter Westgaard ulike menneske som på kvar si side av skalaen har fått til det han drøymer om.

– Dette er Noregs beste skikøyrar, dei som sparar pengar og kjem seg ut ved høve og dei som har valt ein jobb som gir mykje fridom. Det er ikkje rakettforsking, men serien har fått tatt temperaturen på ulike sider av det norske skimiljøet.

Ein av skikøyrarane og friluftsmenneska som Westgaard har møtt er voldingen Stig Helset.

Stig Helset er ein av personane som Petter Westgaard møter i "Glæder"  Foto: Anders Vesterg/Ranglefant

– Stig er ein ringrev som Petter gjerne ville snakke med. Han har ekstremt god lokal kunnskap, men likevel så har han ei doktorgrad i norsk. Då var spørsmålet korleis han får det til.

"Glæder" er på totalt fire episodar. To av dei er filma på Sunnmøre.

– Vi har vore i Molladalen og oppe ved Patchellhytta. To av episodane er filma i Narvik. Der drog vi på segltur i to veker med ein båt som til vanleg har base i Ålesund.

I fjor gav Ranglefant ut dokumentaren "Millom bakkar og berg". No er "Glæder" klar for publikum, og produksjonsselskapet har fleire prosjekt på gang.

– For at hjula skal gå rundt må vi alltid kome på nye idear og få nye jobbar. No er vi i gang med eit nytt kortfilmprosjekt, og det blir arbeida med finansieringa. Det skjer alltid noko med Ranglefant, og det er veldig kjekt.



"Glæder" har premiere 1. november på heimesidene til Friflyt. Kvar fredag gjennom november vil det lansert ein ny episode.