Helse Møre og Romsdal ønskjer å flytte ambulansestasjonen ved sjukehuset til Hovdebygda. Årsaka er mellom anna at det vert kortare utrykkingstid for alle som bur i Ørsta. I dag er det for dårleg responstid for ein av fem ørstingar (20 prosent), i følge Helseføretaket.
- Helse Møre og Romsdal vert målt på responskrava som styresmaktene stiller. Det viser seg diverre at dei i dag ikkje er tilfredsstillande for delar av innbyggjarane i Ørsta kommune, skriv Helse Møre og Romsdal i eit brev til Volda kommune.
I Volda har 96 prosent av befolkinga responstid innanfor gjeldande krav, og i Ørsta berre 80 prosent, i følge tala frå helseføretaket.
Volda protesterer
Volda kommune har vore kritisk til planen om å flytte ambulansestasjonen ut av Volda.
- Eg opptatt av at ambulansestasjonen og den framtidige legevakta må koplast tett saman, og at denne stasjonen bør ligge ved sjukehuset, seier ordførar Jørgen Amdam i Volda.
Han meiner den gamle Hjelpepleiarskulen ved sjukehuset bør bli ny ambulansestasjon/legevakt.
På eit felles møte for ordførarane på Søre Sunnmøre fredag prøvde Volda- ordføraren å få dei andre kommunane på Søre Sunnmøre til å vere med på eit felles utspel.
- Vi må prøve å få helseforetaket til å snu, sa Amdam til Møre-Nytt før møtet.
Men han fekk berre delvis gjennomslag. Søre-ordførarane ber om at Helseføretaket inngår ein mellombels avtale på fem år om leige av lokale til ny ambulansestasjon i Ørsta.
- Vi konkluderte med at helseføretaket kan inngå ein mellombels avtale om nye lokale i Ørsta. Men vi har eit ønskje om samlokalisering mellom ambulansestasjon og legevakt i framtida etter 2022, så vi ber dei om å inngå ein kort leigekontrakt, seier ordførar Knut Erik Engh i Ulstein.
Med andre ord så godtar Søre-ordførarane flytting på kort sikt og arbeider for samlokalisering på lang sikt. Dette vart også godtatt av Volda.
- Så får vi sjå kva helseføretaket seier til det, seier Amdam.
Han er kritisk til talmaterialet som helseføretaket har lagt fram.
- Det kan ikkje stemme at 96 prosent av befolkinga i Volda er innanfor godkjend responstid. Dette må bety at alle dei 1.400 på vestsida ikkje er rekna med. Dessutan vert repsonstida for heile Ørsta betre når vi får Volda-tunnelen.