Juli-tala frå Avinor viser nedgang i flytrafikken over Ørsta–Volda lufthamn, Hovden.
Det var i alt 7.606 registrerte passasjerar til og frå flyplassen, inkludert 110 passasjerar som mellomlanda.
Dette er ei nedgang på 3,5 prosent frå same månad i fjor. Nedgangen er utypisk, for Avinor-flyplassane samla hadde ein vekst på 4,6 prosent, viser månadstala frå Avinor.
Også Sandane lufthamn og Sogndal lufthamn hadde nedgang i trafikken, medan Førde og Florø hadde vekst.
I løpet av dei sju fyrste månadene i år har 62.194 passasjerar reist til og frå Hovden, inkludert 588 transittpassasjerar. Dette er akkurat på same nivå som dei sju fyrste månadene i fjor.
Tala frå Avinor syner at Sogndal, Sandane og Førde har hatt reduksjon i flytrafikken så langt i år. Florø har hatt vekst.