Sunnmørsposten: – Eg er heilt overvelda. Eg har nesten ikkje ord, seier Frislid etter at fleire tusen gjekk i prideparade gjennom gatene i Volda fredag kveld.
– Vi har avliva myta om at ein må flytte ut av bygda om ein er annleis.
Han håper fleire bygder vil la seg inspirere.
– Vi håper dei ser korleis vi har klart å mobilisere bygdene. Eg trur det er sånn i resten av Norge også, så eg håper virkeleg nokon følgjer etter. Om dei gjer det, så er det berre å ringe!
Lensmann: 3.000-4.000 menneske
Først dei siste dagane gjekk det opp for han at dette kunne bli stort. Mykje større enn dei hadde førestilt seg.
Nøyaktig kor mange som gjekk i paraden har ingen sikre tal på, men det var fleire tusen. Det tok ein halvtime frå paraden starta til slutten gjekk forbi.
Lensmann i Volda og Ørsta Guttorm Hagen seier at politiet telte minst 2.000 i sjølve paraden, i tillegg til mellom 1.000 og 2.000 langsmed ruta. Mange slutta seg til toget undervegs.
– Folk gjekk mykje tettare enn i 17. mai-toget, så det var vanskeleg å telle, men der var nok 3-4.000 menneske i aktivitet, seier Hagen.
– Berre vennlegheit
Paraden starta ved omsorgssenteret og avslutta ved Propellhallen, der det vart appellar. Her slapp berre 1.500 inn, og mange sto att ute.
– Dei skulle kanskje hatt talane ute, men det er vanskeleg å planlegge slikt på Sunnmøre, seier lensmannen, som sjølv deltok i parada og seier det heile gjekk fint og fredeleg føre seg.
– Det var ein fin og festleg parade. Det var berre vennlegheit. Volda blei framstilt frå si beste side, både på det mellommenneskelege og med tanke på vêret, seier lensmannen.
Han seier der ikkje var nokon motdemonstrasjonar same dag.
– Der var jo ein demonstrasjon nyleg med rundt 30 personar. Også den var søkt om og gitt løyve til. Det skal vere rom for det med, sjølv om den hadde ein annan dimensjon, seier han.
Anbjørn Steinhol Frislid håper paraden kan bli eit årleg arrangement.
Han håper Bygdepride blir eit årleg arrangement.
– Når vi ser kor stort engasjementet er og for ein folkefest det har vore og blir i helga, så håper eg det, seier han.