I rundt tjue år har unge og gamle, åmdalingar og ikkje åmdalingar, samla seg på pinsemarknaden andre pinsedag. Tradisjonen tru startar dagen med turmarsj frå ungdomshuset og rundt Vatnevatnet. For dei som valte å mosjonere i det strålande vêret fekk også servert saft og vaflar halvvegs på ruta. Det er Åmdal ungdomslag som arrangerer pinsemarknaden, og gjennom åra har det vorte eit populært arrangement.

– Det er flott at vi får slikt vêr, men vi brukar å vere heldige med vêret på dette arrangementet av ein eller annan grunn. Laurdag hadde potetskrellarar i gang, og søndag starta folk å lage salat. I dag er vi rundt tolv personar i sving med arrangementet, seier leiar Lovise Egge i ungdomslaget.

Heilgrilla gris

Då turgåarane var kome tilbake til ungdomshuset starta Volda mannskor sin del av underhaldninga til stor applaus frå dei frammøtte. Det som folk likevel ser mest fram til på pinsemarknaden er den heilgrilla grisen.

– Det er høgdepunktet, og for at ikkje alle skal spørje har vi i år hengt opp eit skilt om når dei byrja å grille grisen, seier Egge.

Populært

Allereie klokka sju om morgonen starta arbeidet med å lage til festmåltidet, og allereie før grisen var ferdig byrja det å danne seg kø for å sikre seg ein smakebit.

– Vi har hatt dette arrangementet i 20–25 år, og det er populært. I fjor selde vi 130 tallerkenar med gris, og vi held det gåande her så lenge det er folk, seier Egge.

Også i år såg det ut til grisen trefte godt smakslaukane til dei frammøtte, og folk kosa seg rundt borda ver ungdomshuset. I tillegg til sal av mat og underhaldning var det også tombola og lagt opp til luftgeværskyting.

Allereie klokka sju om morgonen starta grillinga av grisen, og rundt sju timar seinare var den klar til servering.