Måndag til torsdag i festspelveka er det dokumentarfilmverkstad for ungdom mellom 16 og 22 år på Møre Folkehøgskule.

Ivar Aasen sitt ordtak «Eit lite ord gjer stundom store verk» er inspirasjonskjelde, og den beste filmen blir kåra på Rokken fredag 28. juni Filmregissør og produsent Eirik Vaage leier filmverkstaden. Han har ein master i dokumentarfilm og journalistikk frå Høgskulen i Volda, og er ein erfaren kursleiar i emnet.

Utstyr til fem grupper

– Vi har utstyr til fem grupper, og alle får vise filmane sine på Rokken fredag, seier programansvarleg Karine Munch i Ivar Aasen-tunet. Juryen er til stades under arrangementet og kårar vinnaren på staden. Juryformann Gunnar Strøm har med seg Pål Aam og Hilde Ranheim i panelet.

Møre folkehøgskule blir base for undervisinga og deltakarane får boltre seg fritt i nærmiljøet. Tilreisande kan også overnatte på folkehøgskulen.

– Vi deler deltakarane inn i høvelege grupper, men det er også lov å melde seg på som eit lag, oppmodar kursleiar Eirik Vaage.

Dokumentarfilmverkstaden er eit samarbeid med Trafo, fakultetet for kunstfag ved Universitetet i Agder. Påmeldingsskjema finn folk på nettstaden festspela.no.