Nyskaping gav publikumsvekst

– Vi er så takknemlege og glade, seier styreleiar i Herøyspelet, Linn Therese Sævik, etter ei spelhelg med stor publikumsvekst.

  Foto: Pressefoto

Kultur

Trass tolv sure nordavindsgrader greidde Herøyspelet Kongens Ring å selje 300 fleire billettar i år enn i fjor då spelet gjekk i ei varm sommarhelg.

– Herøyspelet har vore gjennom ei fornying, både på og rundt scena, og vi håper det er dette vi ser resultatet av. I fjor laga vi til vikingleir med aktivitetar for heile familien, i tillegg til at vi hadde open hagefest om kvelden. I år er det lagt vekt på å utvikle sjølve spelet.

Styreleiaren kunne glede seg over myldrande folkeliv på tunet, i vikingleiren og tett med folk i amfiet.

– Og det er ekstra stas å sjå så mange ukjende ansikt mellom gjestene våre. Her har vore mykje folk frå heile Nordvestlandet. Kongens Ring og spelhelga har kvalitetar det er verd å reise for, noko stadig fleire oppdagar.

Spennande med nyskaping

Sævik seier det har vore eit spennande år.

– Det har vore så mykje nytt, med ny regissør, ny regi og nye hovudroller. Og så fekk vi utfordrande forhold i starten av veka, med det suraste og våtaste øve-veret vi kan huske. Men med super innsats frå folk både på og rundt scena, så vart det både spel - og eit spel vi er svært fornøgde med.

Linn Therese Sævik vil gjerne rose alle dei frivillege som gjer at det kan bli spel.

– Eg er så stolt over og glad for dugnadsgjengen. Utan alle som hjelper til kunne vi ikkje arrangert Herøyspelet. Kvart einaste år vert det lagt ned dugnadsinnsats tilsvarande fem, seks årsverk. Dette er eit storløft for kulturen i regionen, og vi gler oss over at også publikum set pris på det som blir skapt i spelhelga.