Saksa Turstiforeining hadde von om rundt femti deltakarar då den første utgåva av motbakkeløpet Saksaløpet vart arrangert laurdag. Rundt 200 deltakarar tok del i løpet og passerte mållina rett under toppen av Saksa.
- Det er over all forventning. På alle måter har det vore eit knirkefritt arrangement. Her har vore fine premiar, hurtigruteturistar og stemninga har vore god, seier leiar Jens Arve Forbord i Saksa Turstiforeining.
Ein stad mellom 200 og 300 personar var innom toppen av Saksa under motbakkeløpet. I konkurranseklassa var det rundt 70 deltakarar. Andreas Skylstad var på førehand ein lokal favoritt. Favorittstempelet innfridde han med tida 44.38.
- Eg opna litt hardt og var litt redd for at eg skulle gå på ein smell, men heldigvis så heldt det heile vegen opp for meg. Eg er godt nøgd med løpet og prestasjonen, sa den raskaste blant herrane etter målgang.
59 sekund bak Skylstad kom Sverre Nesdal Aske i mål og tok andreplassen i herreklassa, men førsteplassen i menn 35-49 år. Håvard Myklebust sikra seg andreplassen i menn 23-34 år med tida 46.05, og tredjeplassen i herreklassa.
Håkon Øyehaug Moe vann klassa for menn 15-22 år med tida 54.19. Trond Midtkandal vann klassa for menn 50+ med tida 54.20.
Blant kvinnene var Lucy Jancus raskast med tida 56.16, og vinnaren blant damene var godt nøgd etter løpet.
- Eg opna litt hardt, men eg kom meg først i mål, sa Jancus med eit smil. Opphavleg kjem Jancus frå Slovakia, men ho er busett i Hemsedal.
Anniken Hjellbakk Hole (Sunnylven IL) kom i mål 55 sekund bak Jancus og tok 2. plassen totalt og i klassa kvinner 23-34 år. Emma Randby vann klassa for kvinner 15-22 år med tida 1.02.10 og tok tredjeplassen totalt. Britt Elin Roald Farstad var klassevinnar i kvinner 35-49 år, og Kari-Anne Tryggestad Ryste vann klassa kvinna 50+.