I påska er det fast tradisjon med ulike rettar av lam, og då gjerne lammesteik eller lammelår. Denne retten er ein ny vri på det tradisjonelle lammelåret og er absolutt verdt å prøve. Server steika og tilbehøyret gjerne saman med hasselbackpoteter for å få den perfekte smaksopplevinga.
Ingrediensar til ca. 6 personar:
• ca. 1,6 kg beinfri lammesteik
• 2 kvitløksfedd
• ¾ dl olivenolje
• 3 ss fersk persille, finhakka
• 2 ss fersk rosmarin, finhakka
• 1 ss fersk timian, finhakka
• 2 ss sitronskal, rive
• 2 ss sitronsaft
• salt & pepar
• parmesan, riven
Ertepuré:
• 500 g grøne erter, frosne
• 2 små sjalottløk
• 3–4 ss fersk mynte, finhakka
• nokre ss rømme
• olivenolje
• sitronsaft
• salt
Raudvinssjy:
• 7 ½ dl kraft av lam (ev. anna kjøtkraft)
• 1 ½ dl raudvin
• 1 ½ ss soyasaus
• 1 ½ ss balsamicoeddik
• 2 ss maizena + 1 ss kaldt vatn
• salt & pepar
Skjær kvitløksfedda i tynne skiver og lag små fordjupingar i lammekjøtet som du stikk dei nedi. Gni steika inn med salt og pepar. Bland saman olivenolje, urter, sitronskal- og saft. Set lammesteika i ei eldfast form og fordel urteblandinga på toppen av lammesteika. La kjøtet gjerne stå og marinere i kjøleskap over natta.
Forvarm steikeomnen til 220 grader. Sett eit steiketermometer på skrå inn i midten av steika. Strø eit godt lag med riven parmesan på toppen av steika og set midt i omnen. Lat det stå i ca. 20 minutt før du skrur ned temperaturen til 175 grader. Lat steika stå til den når ein kjernetemperatur på 62 grader (dette gir lyst rosa og saftig kjøt).
Ha kraft, raudvin, soyasaus og balsamicoeddik i ein kjele og kok opp. Tilsett maizena med vatn under omrøring og la det tjukne litt. La sausen småkoke til væska er redusert til ca. halvparten. Smak til med salt og pepar.
Medan sausen småkokar lagar du ertepuréen. Skjær sjalottløk i tynne ringar og ha det i ein kjele med vatn. Kok opp og ha i ertene. Lat dei bli gjennomvarme før du heller av kokevatnet. Ha i fersk mynte, rømme og litt olivenolje og køyr blandinga til puré med stavmiksar. Tilset meir olivenolje og rømme til passe laus konsistens. Smak til med sitronsaft, salt og eventuelt meir mynte. Skjær lammekjøtet i skiver og server saman med tilbehøyret.
Mari-Lene KorsnesMatbloggar og student ved Høgskulen i Volda
