Panna Cotta betyr «kokt fløyte» og er ein italiensk dessertpudding som originalt er laga av fløte, gelatin, vanilje og sukker. Desserten er fløyelsmjuk og frisk på både smak og utsjånad. Panna cotta er også den desserten eg har servert mest av med ulike smaksvariasjonar og er ein dessert eg aldri blir lei.
Ingrediensar til 4 personar:
Kvit sjokolade-panna cotta:
• 2 ½ gelatinplater
• 2 ½ dl fløyte
• 1 dl heilmjølk
• 2 ss sukker
• 100 g kvit sjokolade av god kvalitet, finhakka
• 3 ss lettrømme
Kiwipurè:
• 4 kiwi, godt modne
• 2 ss melis
• 2 ss fersk mynte
• sitronsaft
Legg gelatinplatene i bløyt i kaldt vatn i ca. 5 minutt. Ha fløyte, mjølk og sukker i ein kjele og gi det eit lite oppkok. Klem ut vatnet av gelatinen og ha det i den varme fløyten og rør rundt. Trekk kjelen av varmen og tilsett den finhakka sjokoladen. La det stå litt før du rører i det. Etter nokre minutt kan du røre rundt med ein visp til all sjokoladen er smelta inn i fløyten. La det kjøle seg ned eit par minutt før du rører inn lettrømme til alt er glatt og blankt. Hell blandinga over i porsjonsglas og la det avkjøle seg litt før du sett glasa i kjøleskapet. La puddingen stå kaldt til den er stiv, ca. 2-3 timar eller gjerne til neste dag.
Skjær av skalet på kiwiane og ha fruktkjøtet i ein stavmiksar saman med melis og fersk mynte og kjør til ein glatt puré. Smak til med sitronsaft og eventuelt meir melis etter behov. Hell eit lag med kiwipuré over kvar panna cotta og server.
Mari-Lene KorsnesMatbloggar og student i matkultur og helse ved Høgskulen i Volda
