Sæbø har berre éin minibank, og den er fleire butikkar og tilreisande avhengig av. Nilsbuda og Strands Bakeri på Sæbø var nokre av butikkane som fekk kjenne på konsekvensen av ein tom minibank.
– Når det er etablert ein minibank på Sæbø som vi er avhengig av, så må den kunne levere den tenesta den skal, seier Kari Stokke, som jobbar frivillig i Nilsbuda på Sæbø når ho har tid.
Det vart ringt til Sparebank 1 i helga, der problemet vart forklart.
– Banken svarte at vi i mellomtida måtte ta i bruk ein annan minibank på staden. Vi forklarte til dei at Sæbø berre har éin, fortel Kanutte Strand frå Strands Bakeri.
Mange avhengig
– Det er verken kjekt for kundane eller oss å måtte avvise kjøp av varer grunna mangel på kontantar, og ein minibank som ikkje har pengar. I heile juli har vi ope kvar dag, og i helgane har vi mykje besøkjande. Nilsbuda er med på å lage aktivitet på Sæbø. Det er synd når vi støyter på utfordringar som kan påverke dette, fortel Kari Stokke.
Både Nilsbuda og Strands bakeri har ope berre om sommaren. Det er derfor ikkje gunstig å betale leige av kortterminal.
– Dessutan kan vi vanlegvis ta ut pengar rett rundt hjørnet, seier Stokke.
Heldigvis hjelpte matbutikkane på Sæbø til så godt dei kunne, og gav løyve til kontantuttak ved bruk av bankkort.
– Det har vore noko utfordrande å måtte forklare problemet til utanlandske turistar. Heldigvis har butikkane hjelpt til, og kundane har klart å skrape saman kontantar frå lommeboka, seier Kanutte Strand.
Teke hand om
På tysdag klokka 12 vart minibanken fylt på med kontantar frå Nokas som kjem tilreisande frå Molde. Minibanken på Sæbø vert vanlegvis fylt på ein gong i månaden.
– Grunna ferieavvikling vart det diverre for lite oppfølging av pengane i minibanken på Sæbø. I tillegg har mykje turisme, noko som er positivt, gjort kontantuttaka større i sommar. Dette har vi no teke lærdom av, fortel Øyvind Årdal frå Sparebank 1.