Og det er eit anlegg med store dimensjonar politikarar på kommune,- fylkes- og riksnivå fekk presentert då Marine Harvest måndag inviterte til orientering.

I 2012 fann ein det minste anlegget i Marine Harvest-konsernet i Steinsvika i Volda. I dag, tre år seinare, er det bygt opp eit gigantanlegg som kan levere 7,5 millionar smolt og ein produksjon på 1.310 tonn. 14 personar skal jobbe på anlegget som har ei kostnadsramme på 235 millionar kroner. Tanken er at oppdrettsanlegga i Sogn og Fjordane og Møre og Romsdal skal verte sjølvforsynte med smolt. Ørstingen John Ivar Sætre, som er produksjonssjef innan ferskvatn i Marine Harvest Vest, fortel om fleire føremoner med eit anlegg basert på resirkulert vatn.

– Vassforbruket vert redusert, og vi får stabile produksjonsforhold, god vasskvalitet og lågare oppvarmingskostnader, fortel Sætre.

Han og andre tilsette i Marine Harvest Region Vest tok imot og orienterte politikarar om bord i ferja Fjordkongen om stoda i sjømatnæringa som Marine Harvest representerer.

65 personar har vore i sving for å byggje anlegget i Steinsvika der det er nytta m.a. 6.000 tonn betong, eller nær 700 billass, og det er etablert eit røyrsystem på 12.000 meter gjennom grunnen og bygningane.

80-talet

Det første setjefiskanlegget i Steinsvika vart bygd på 80-talet. Det vart etter kvart kjøpt opp av Pan Fish og deretter Marine Harvest. Siste åra har det skjedd store endringar i sjøkanten av det vesle bygdesamfunnet, og no er straks det nye smoltanlegget komplett. Anlegget har konsesjon på 7,5 millionar smolt.

Region Vest er lokalisert med anlegg frå Hustadvika i nord til Gulen i sør. Marine Harvest har i dette området 68 konsesjonar i åtte kommunar, og 462 personar har i dag arbeidsplassen sin i denne delen av konsernet. To av dei sju setjefiskanlegga ligg i Dalsfjorden.

Potensialet innan Marine Harvest si verksemd er stor og det er grunn til ei femdobling av produksjonen, var meldinga frå selskapet sine folk.

– Miljømessig berekraft er nøkkelen til framtidige arbeidsplassar og profitt. Dette krev ein lang horisont, eit føreseieleg regulatorisk rammeverk, strenge reguleringar og rettvise og hyppige tilsyn og kontrollar – og ei utvikling drive av FOU, fortalde Marine Harvest sine folk.

Oppmoding

Dei oppmoda politikarane om å ha auka fokus på sjømatproduksjon og å halde oppe fylket sin posisjon innan denne næringa.

– Vi må ha nok areal til auka verdiskaping og sysselsetjing, gode kommunikasjonar, ikkje minst Stad skipstunnel. Skal vi femdoble produksjonen, må ein del av varene også gå via båt, sa produksjonssjef for sjøsida, Asgeir Hasund.

Politikarane var godt nøgde med informasjonen.

– Eg er stolt over at Marine Harvest har valt å etablere seg i Volda. Det er lærerikt å sjå anlegga dykkar og få informasjon om drifta, og det er kjekt å sjå at de legg stor vekt på berekraftig utvikling og at de driv miljøretta. Dette er viktig for å utvikle seg. Det er også flott at de ser på dette som ei distriktsnæring, sa Volda-ordførar Arild Iversen.

Nyleg er det brukt 80 millionar kroner til å ruste opp smoltanlegget på Dravlaus. Med gigantanlegget i Steinsvika utgjer no dei to lokalitetane i Dalsfjorden kring halvparten av smoltproduksjonen i Marine Harvest Region Vest.