Ein seljar for Tussafibar vitja huset til Kristiansen for to veker sidan. Dei var i tvil om dette var noko dei måtte ha og ville gjerne ha telefonnummeret til seljaren slik at dei kunne ta kontakt om det var aktuelt. Seljaren gav då beskjed om at dei måtte ringe uansett for han måtte ha eit svar. Kristiansen tok kontakt med seljaren nokre dagar seinare, og gav klar beskjed at det ikkje var aktuelt med Tussafiber. Nokre dagar seinare stod same seljaren på døra igjen, men fekk igjen beskjed om at det ikkje var aktuelt.

Fekk registrert bestilling

Ei tekstmelding om at bestillinga av Tussafiber var notert tikka inn på telefonen, og seinare på dagen kom ein e-post med same beskjed. Kundesenteret til Tussa vart kontakta, og det vart sendt e-post til Tussa om at dei ikkje hadde bestilt noko. Nokre dagar seinare kom ein ny e-post med stadfesting av bestillinga som ikkje var gjort.

– Det er i alle fall ikkje høflege folk som oppfører seg slik. Det kan ikkje vere opp til oss å avbestille noko som ikkje var bestilt, seier Kristiansen som påpeikar at naboar og har reagert på seljaren.

– Har beklaga

Administrerande direktør Ivar Driveklepp i Tussa IKT seier at dei no har stramma inn på rutinane.

– Etter at vi vart kjend med saka har vi beklaga det som skjedde direkte overfor kunde. Det er ikkje slik vi ønskjer å framstå. Vi har drøfta saka internt og stramma inn på rutinane. Vi vil løpande ta kontakt med dei kundane som har fått besøk av våre seljarar og sjekke ut korleis dei har oppført seg. For å sjekke ut dette vil vi ta stikkprøver. Om stikkprøvene skulle avdekke noko vi ikkje kan stå inne for vil vi gjere nødvendige grep for å korrigere dette.