- No gjenstår berre finpussen, så er alt klart til ei heidundrande  kulturmønstring, fortel Rebecca Bjerknes. Ho er leiar for frivilligsentralen i Ørsta og har i  år ansvaret for den første felles mønstringa for Volda og Ørsta på svært lenge.

Varierte innslag

Etter ein litt treg start for påmeldingane, vert det no 20 ulike innslag frå scena og 5 deltakarar i kunstkategorien.

– Det er stor varisjon i innslaga til dei ulike deltakarane. Alt frå film, til klassisk piano, til stand-up, dans og trommer, i tillegg til mange fantastiske songarar er påmelde i scenekategorien.  I tillegg vert det ei variert og spennande kunstutstilling, der deltakarane stiller med fleire bilete kvar, og teknikkane varierer frå blyanteikningar til måleri og datateikningar.

-  Ekstra kjekt er det at deltakarane er om lag jamnt fordelte mellom kommunane, seier Bjerknes. Eg trur dette viser at avstanden mellom Ørsta og Volda er like liten som vi trudde.

Programleiarar

Unge programleiarspirar frå Volda og Ørsta har i forkant av mønstringa vore inviterte på programleiarkurs. Dette er eit nytt konsept i Ørsta, men tradisjon for Volda.

Det var fem påmelde til kurset, leia av Birgit Berg, som tok for seg ulike teknikkar for å vere trygg på seg sjølv på scena. Alle fem vert å finne på scena på søndag:

– Lisa Follestad, Otilie Klokk, Trude Vartdal, Kristianne Farstad Bergseth og Sigurjon Sveinsson skal leie oss trygt gjennom mønstringa og dei lovar eit forrykande show.

Juryen

– Det vert ein tøff jobb for juryen i år med mange flotte innslag å velje mellom. I tillegg skal dei i år sende vidare frå to ulike kommunar.  Juryen kan sende vidare inn til tre sceneinnslag frå kvar kommune, i tillegg til kunstinnslag frå kvar. Det vert nok heilt sikkert vanskeleg å velje, men vi har ein god jury med mykje erfaring innan sine område, så eg er sikker på at det går veldig fint, seier Bjerknes.

Scenejuryen består i år av Marie Austrheim Riise, Stig Ulvestad og Tone Rustestuen Aarhus. Kunstjuryen av Lena Bratteberg og Ingeborg Rørvik Lejon. Også her er det representantar frå begge kommunar.

Samarbeid

– Sjølv om det i år er nytt at kulturmønstringa er felles for kommunane, er det ikkje nytt at den er arrangert ved hjelp av godt samarbeid. Tilsette frå kulturavdelingane, samt frivillige frå ungdomsråda og ungdomsklubbane er alle aktive for å få mønstringa på plass. Det er viktig for oss at ungdomen får vere aktive i planlegging og gjennomføringa av  denne kulturarenaen, som er til for nettop dei, påpeikar Bjerknes.