Helse- og omsorgsminister Bent Høie vedtok i føretaksmøte fredag å legge nytt sjukehus for Nordmøre og Romsdal til Opdøl ved Molde.

Dermed har statsråden kome fram til same konklusjon som styra i Helse Møre og Romsdal og Helse Midt-Norge.

– Dette har vore ein lang og svært krevjande prosess over mange år, og eg har stor forståing for at spørsmålet om tomteval engasjerer og vekkjer mange kjensler i befolkninga. Eg er glad for at vi no får landa tomtevalet, slik at vi i dag har kome eit steg nærmare målet om nytt sjukehus for Nordmøre og Romsdal. Det er viktig for å gi pasientane i fylket best muleg pasientbehandling i framtida, seier Bent Høie.

Tilrådingar

Styret i Helse Møre og Romsdal tilrådde onsdag eit nytt sjukehus på Opdøl ved Molde, det same gjorde styret i Helse Midt-Norge torsdag 18. desember.

– Alle rapportar som er levert har gitt eit godt avgjerdsgrunnlag. Eg deler styret i Helse Midt-Norge sitt syn når det i sitt vedtak legger vekt på fordelane ved å lokalisere det nye sjukehuset nær det største fagmiljøet. Styret har også vektlagt lokalisering som vil gi kortast reisetid for flest innbyggjarar, samstundes som det vil gje forsvarleg tilbod om spesialist- og sjukehustenester for alle innbyggjarar i opptaksområdet. Det er viktig at det vert planlagt for eit godt poliklinisk tilbod i Kristiansund og at dei prehospitale tenestene vert vidareutvikla slik at vi sikrar ein forsvarleg akuttberedskap og sikrar dei innbyggjarane som får lengst reiseveg til sjukehus.

Ålesund hovudsjukehus

- Ålesund sjukehus skal framleis vere hovudsjukehuset i Helse Møre og Romsdal, seier Bent Høie.

Statsråden ønskjer no å komme vidare i arbeidet mot eit nytt sjukehus.

– No som avgjerda er teken, er det viktig å jobbe saman for å få til eit nytt og moderne sjukehus til det beste for pasienten, seier Høie.