Nav i Møre og Romsdal presenterte fredag arbeidsløysetala for november.
Dei syner at det ved utgangen av månaden var 105 personar heilt utan arbeid i Ørsta. Det er 23 fleire enn på same tidspunktet for eitt år sidan. Samanlikna med utgangen av oktober er det ein reduksjon på to personar.
Av dei arbeidsledige i Ørsta er 61 menn og 44 kvinner. Talet på personar heilt utan arbeid i Ørsta utgjer 1,9 prosent av arbeidsstokken.
I Volda er arbeidsløysetala veldig stabile. Ved utgangen av november var det registrert 67 personar heilt utan arbeid, og det er ein meir enn for eitt år sidan og to færre enn ved utgangen av oktober.
Arbeidsløysa i Volda utgjer 1,5 prosent av arbeidsstokken, og det var 44 menn og 23 kvinner heilt utan arbeid ved utgangen av denne månaden.
I Møre og Romsdal ligg arbeidsløysa ved utgangen av november på 2,1 prosent, og i Noreg totalt ligg ho på 2,6 prosent.