Søndag morgon vart det mørkt langs Norangsfjorden. Eit tre velta over ei kraftline ved Lekneset, og alle husstandar på Urke og Øye vart utan straum.
Straumbrot i Norangsfjorden
Straumbrotet varte frå om lag klokka 07.30 til om lag klokka 15 søndag. Tussa måtte sende montørar med delar over fjorden to gongar for å få retta feilen.
– Det er vanskeleg terreng i området, så det var ganske krevjande å få retta feilen, seier nettsjef Arve Hovdenak i Mørenett til Møre-Nytt.
Mange på Urke har spurt kvifor ikkje kraftverket i bygda vart sett i drift for å få straumen på plass att raskare. På Facebook-gruppa «Hjørundfjorden – ei perle på Sunnmøre» undrar fleire seg over kvifor ikkje dette vart gjort. «Tvilar på dette kunne gå føre seg i Ørsta sentrum», skriv Kåre Myklebust.
Mogleg å starte
Knut Leira i Tussa Energi AS forstår at det blir stilt slike spørsmål, og stadfestar at det er mogleg.
– Teknisk sett er det mogleg at kraftverket blir brukt lokalt på denne måten. Men det er ikkje berre å slå på ein brytar, og krev så mykje arbeid at vi ikkje såg det som formålstenleg, seier han.
Elektroingeniør John Harald Sandblost utdjupar:
– Dette er eit elvekraftverk, så det første vi er avhengige av er nok vatn. Det hadde vi i dette tilfellet. Deretter må vi ha folk ute i felten for å kople ut liner og isolere området frå det kraftnettet elles. Dette krev innsats frå fleire hald, og tek o tid.
Ved straumbrot som er såpass korte som det var på søndag, meiner Tussa det ikkje er noko poeng i å setje i gang kraftverket.
– Sannsynlegvis hadde vi ikkje fått det i gang før kort tid før straumen var tilbake, så i dette tilfellet hadde det truleg ikkje hatt så mykje å seie, seier Leira.
Kan bli aktuelt
Ved lengre straumbrot er det meir aktuelt å nytte seg av denne løysinga.
– Det var ein diskusjon rundt det i samband med orkanen «Dagmar». Då hadde vi så mange andre gjeremål, at det ikkje vart prioritert. Ved lange periodar utan straum kan det likevel vere meir formålstenleg å starte kraftverket.