Det bur 10.560 personar med adresse i Ørsta kommune. Det viser ferske tal frå Statistisk sentralbyrå, som gjeld per 1. juli. Utviklinga det siste kvartalet vitnar om ein vekst som er mindre enn vanleg.
Auken i Ørsta
I heile Noreg var det ein folkevekst på totalt 13.296 i andre kvartal. Det betyr at det har vore ein auke på 2,69 personar for kvart tusen noverande innbyggjar i perioden frå 1. april til 1. juli i år. Noreg har dermed eit innbyggjartal på 5.137.679 no.
Tilsvarande har det i Ørsta kommune vore ein auke på 1,04 personar per tusen noverande i andre kvartal. Det betyr ein folkeauke på elleve i desse tre månadene.
I Volda kommune er det offisielle befolkningstalet på 8.932, som er fem færre enn ved inngangen på andre kvartal. Reduksjonen tilsvarer 0,56 per tusen innbyggjar.
Perioden april-juli er det kvartalet der mange studentar flytter heim. Dette gir naturleg nok utslag i kommunar med høgskular og universitet, som i Volda. I neste kvartal er nye studentar på plass, og folketalet aukar truleg igjen.
Best i Møre og Romsdal
I Møre og Romsdal har det kome til 2,42 personar per tusen innbyggjar, og det bur totalt 262.762 innbyggjarar her no. Den aller beste auken har Aukra kommune hatt, der dei 36 ”nye” bebuarane utgjer ein auke på 10,49 per tusen innbyggjar. Deretter følgjer Giske kommune med ein auke på 9,83 per tusen. Dårlegaste utvikling i Møre og Romsdal hadde Sandøy kommune, der folketalet gjekk tilbake med 7,84 per tusen gjeldande.
Det er Kvitsøy kommune i Rogaland som blir ståande som vinner i andre kvartal, då folketalet her auka med 16,8 per tusen. I motsett ende finn vi Berg i Troms, som gjekk tilbake 23,4 per tusen.
Dette er altså ei oversikt over alle dei 428 kommunane i Noreg, og på denne lista finn vi Ørsta på 242. plass, og Volda som nummer 310.
Fødslar og dødsfall
Befolkningsutviklinga blir fastsett av mengda fødslar og kor mange som gjekk bort - samt flytterekneskapen. I Ørsta kommune blei det født 21 babyar i andre kvartal, mens 30 personar døydde i same periode. Vidare finn vi at 101 personar flytta inn i kommunen, inkludert innvandring. Så var det 81 personar som flytte ut av kommunen, anten innanlandsk eller ut av landet.
I Volda kommune var det og 21 fødslar, men berre 14 dødsfall i andre kvartal. Her var det 120 som flytta inn i kommunen, mens 132 pakka sakene og reiste andre vegen.