Sigrun Aarseth sit benka saman med barnebarnet Malina Aarseth og klassevenninna hennar Lisa Vestre Velle på Velle skule. Ho er tilbake på skulebenken for å lære dei unge håpefulle strikking.
– Det er kjempeflott at besteforeldre, og også foreldre som har høve, stiller opp, seier lærar Berit Hallaråker.
– Det gjer godt med ekstra hender når vi held på med dette. Om eg skulle vere her aleine ville ikkje tida ha strekt til, seier ho.
Velle skule har ein lang tradisjon med å invitere strikkekyndige familiemedlemer inn i timen for å hjelpe til med undervisninga i strikking. Handarbeid er eitt av læremåla til elevane, og også dei synest det er stas med litt ekstrahjelp.
– Farmor er utruleg flink til å strikke. Ho har til og med strikka genseren eg har på meg no, fortel Oda Grimstad Kriken, som er i ferd med å ferdigstille strikkeugla si.
– Og så er det utruleg avslappande og fint å sitte med eit strikk, meiner ho.
Farmor Rinni Grimstad er glad for å kunne vere til hjelp.
– Dette er eit veldig flott og kjekt opplegg som kan vere ein idé for fleire også, trur ho.
– Og så er det jo veldig kjekt å vere på skule igjen! Og kjekt å kunne overføre denne kunnskapen til neste generasjon, seier ho.
– På gøyometeret går det halvvegs, meiner Daniel Stokke Bjerkestrand, om det å strikke.
– Men eg får det til! Klart det.