Til kommunestyremøtet komande torsdag har Aklestad sendt inn ein interpellasjon om saka. Her viser ho til at det er avdekt at bemanningsbyrået Orange Helse, som Ørsta kommune nyttar seg av, har ei historie med bruk av skatteparadis ulovlege arbeidskontraktar, brot på arbeidsmiljølova, vanskar med innsyn osb.
– Selskapet har fått alvorlege skuldingar mot seg for å ha sosial dumping som forretningsmodell. Det har kome fram at lønningane til arbeidarane har vore langt under tariff, skriv Aklestad m.a.
Ho meiner det er behov for ei utgreiing av omfanget av bruken av innleige i helse- og omsorgssektoren i Ørsta kommune.
– Vi må ha oversikt over kva avtalar Ørsta kommune har med dette selskapet i dag. Vi må vite kor lange kontraktar det er snakk om, og kva kriterium som er lagde til grunn, skriv Aklestad.
Ho ber om at kommunestyret vedtek at det vert utreidd ei sak om bruken av bemanningsbyrå.