Ørsta avslutta 2017 med tre strake sigrar i 3. divisjon avdeling 1 mot Langevåg, Vikhammer 2 og Midsund. I helga venta dei første kampane i 2018. Første motstandar laurdag var Klæbu på bortebane. Heimelaget var favorittar før kampstart, og midtvegs i 1. omgang var Klæbu i leiinga 11–6. Den avstanden heldt seg mellom laga ut omgangen. Til pause var vertane i føringa 18–12.
Utover i 2. omgang var det nivåforskjell mellom laga, og leiinga for vertane auka. Då sluttsignalet gjekk viste resultattavla 39-26-siger i favør Klæbu. For Ørsta var Anders Vatsaas toppskårar med sju mål.
Søndag var det nye sjansar for Ørsta då Vikhammer 2 stod på motsett banehalvdel. Etter ei jamn opning på kampen var det gjestene som tok initiativet. Skåringar av Per Ingebrigtsen, Frode Brandal Moe og Bjørnar Sundnes gav Ørsta leiinga 8–4 etter tolv minutt. Vikhammer 2 klarte å kutte leiinga til eitt mål ti minutt før pause, men i siste tredjedel av omgangen var Ørsta klart best. Med seks skåringar på rad, det siste frå Sundnes, gjekk bortelaget i garderoben med 18-12-leiing.
Etter kvilen klarte Ørsta å halde på leiinga dei første ti minutta. Etter fjorten minutt var stillinga 24–23 til Ørsta og gjestene tok timeout. Ørsta kjempa godt det siste kvarteret av kampen, og kunne sleppe jubelen laus for 29-26-siger. Vatsaas vart toppskårar med elleve mål.
Dette var Ørsta sin femte siger for sesongen. Laget ligg på 7.-plass i divisjonen. Til helga er det igjen klart for langtur. No ventar kampar mot Frøya og Orkanger på bortebane.