Politiet ynskjer tips om samband med overfallet på ei ung kvinne i Volda natt til søndag. Måndag ettermiddag vart det sendt ut eit meir detaljert signalement.
–Mannen hadde på seg mørk caps, mørk jakke og lys bukse. I tillegg kan vi opplyse av han var liten av vekst og mørkhuda. Mannen vart observert springande i retning området ved torget, seier etterforskingsleiar Grete Hjelle ved Møre og Romsdal politidistrikt.
Utvidar tidsromet
Politiet utvidar dessutan tidsromet som ein ynskjer tips om. Ein ynskjer no å kome i kontakt med personar som var i Halkjelsgata i Volda sentrum i tidsrommet frå 02.00 til 03.30 natt til søndag 3. september.
– Det er viktig at dei som kan ha vitneobservasjonar eller tips til oss, kjem med desse så raskt som mogleg, seier etterforskingsleiar Hjelle.
Etterforskinga som vart sett i gang natt til søndag etter meldinga om at ei ung kvinne hadde vorte overfallen i sin eigen bopel, heldt fram med full styrke måndag.
Men førebels er ingen pågripen eller sikta i saka, opplyser politiet i ei pressemelding.