Når det skal arbeidast for å skaffe Møre og Romsdal fleire statlege arbeidsplassar, er Ørsta/Volda eit av områda det skal satsast på.

Det går fram av strategien for å skaffe fylket fleire statlege arbeidsplassar. Regional- og miljøutvalet har samrøystes vedteke strategien.

I denne heiter det at det er i regionsentera i arbeidsmarknadsregionane slike etableringar må kome. Det er i dag fire arbeidsmarknadsregionar i fylket, og Ørsta/Volda vert rekna som regionsenteret for Søre Sunnmøre.

Av strategien går det fram at etablering av statlege arbeidsplassar både handlar om å nå tak i dei som vert flytta ut av Oslo, nå tak i det nye etableringane, og ta vare på og vidareutvikle dei som allereie er etablert i fylket.

Kristiansund og Søre Sunnmøre har lågast dekning no.