Det sa Martin Foldal, dagleg leiar i Sunnmøre kulturnæringshage i Volda, då han orienterte Volda formannskap om prosjektet i førre veke.
Kulturnæringshagen vart starta opp i 2012, med mål om å vere ein katalysator for å skape nye gründerbedrifter i regionen. 75 prosent av kostnaden med kulturnæringshagen er dekt av staten, medan medlemsbedriftene sjølve dekker 25 prosent.
74 mill. kroner
Fem år seinare har Sunnmøre kulturnæringshage bidrege til å starte opp 54 nye selskap i Volda, og bedriftene har fått til saman 5,4 millionar kroner i tilskot frå Innovasjon Norge og Forskingsrådet. I 2016 omsette bedriftene for til saman 74 millionar kroner, eks. moms.
– Undersøkingane vi har gjort viser også at vi har hatt ei betydeleg betring i tilbakemeldingane frå bedriftene frå oppstartsåra til i dag, sa Foldal.
Auka tilskot
No har Sunnmøre kulturnæringshage fått auka tilskotet frå SIVA, det statlege føretaket som organiserer næringshagane i Noreg.
– Tilskotet er auka frå 650.000 kroner til 1,1 mill. kroner. Det gjer at vi kan opprette ei ny stilling, og vi vil tilsette ein ny person som skal jobbe med marknadsutvikling, sa Foldal.
Sunnmøre kulturnæringshage jobbar også med å samarbeide tettare med dei 39 andre næringshagane i Noreg, ikkje minst gjennom ein felles avtale med næringshagane i Stryn og på Nordfjordeid. Det er også oppretta samarbeid med Sparebank 1 Søre Sunnmøre, ikkje minst gjennom nyskapingsdagen, som skal vere eit supplement til næringskonferansen i Ørsta.
Volda kunnskapspark
Mediefaga ved høgskulen skal etter planen ut av Ivar Aasen-huset innan få år. Det blir no jobba med å opprette ein kunnskapspark i huset, der gründerbedrifter og andre kan samlokaliserast.
– Vi jobbar no med eit forprosjekt, som skal gå fram til 2018. 500 kvadratmeter av bygget er tinga allereie før vi har starta å marknadsføre det, sa Foldal, som la til at kunnskapsparken skal samle mellom 100 og 150 arbeidsplassar.
