Det seier dagleg leiar i AG Plan og Arkitektur, Kåre Gjengedal.
I saka om Pe-garden bustadfelt i Ytrehovden, som vart godkjent i kommunestyret sist veke, reiser Frode Thomas Weider spørsmål om habiliteten til AG Plan og Arkitektur i saka der han meiner det er tvilsamt at same firmaet skal ha reguleringsarbeidet samtidig som det har økonomiske interesser av realiseringa av bustadfeltet. Weider meiner den vedtekne bustadplanen vil øydeleggje for eigedomen hans.
AG Plan og Arkitektur har utarbeidd bustadplanen for oppdragsgjevaren. Kåre Gjengedal meiner kritikken er grunnlaus.
– Vi utarbeidde planframlegget som uavhengig rådgivar og med den kompetansen som plan- og bygningslova krev. Plangrensa for feltet og tilgrensande areal til feltet vart fastsett av kommunen. Samfunnsutvalet i kommunen (SFU) bad om at planområdet vart utvida slik at det omfatta naudsynt areal for fortau på strekninga frå Hovden Møbel til krysset med fylkesveg 47 (ved Ervingen). SFU bad vidare om at det vart stilt krav til utbyggingsavtale og rekkefølgjekrav til utbygging på strekninga frå Hovden Møbel til første vegkryss som fører til Enokmarka, seier Gjengedal.
Han viser til at planframlegget er gått grundig gjennom av kommunen.
- Utbyggjaren får ein kjempegevinst, vi får berre oppvasken
Ettersyn
– Først i samband med sak til formannskapet der planframlegget vart vedteke lagt ut til offentleg ettersyn. Deretter vurderte kommunen merknadene til planframlegget, og utarbeidde ny sak for formannskapet. Dei handsama merknadene i saka, og førebudde saka til kommunestyret som gjorde ei sjølvstendig vurdering av plansaka og vedtok planen på fritt grunnlag, seier Gjengedal.
Han minner også om at det var kommunestyret som gjennom godkjenning av kommunedelplanen for Hovdebygda bestemte at Ytrehvdevegen skal utvidast med gang-/sykkelveg eller fortau slik reguleringsplanen no viser.