Prosjektet handlar om utbygging av lågblokker, og to- og firemannsbustader på eit nær 20 dekar stort område mellom E39 og bustadområdet Rystefeltet.
Det er utarbeidd reguleringsplan for prosjektet som no skal opp til vurdering i kommunen sitt planutval. Per Mulvik AS har på vegner av Din Bolig AS utarbeidd framlegget til detaljreguleringsplanen. I planframlegget er det lagt til rette for totalt 64 nye bueiningar fordelt på lågblokker med parkeringskjellar, firemannsbustader med carport/garasje og kjeda tomannsbustader med integrert garasje. Etter ønske frå kommunen gir framlegget også ny køyre- tilkomst til gbnr.49/5 like nord for planområdet og innregulering av busslomme ved Leitetvegen.
Hovuddelen av planområdet er uregulert, men nord-vestre og sør-austre hjørne av planområdet grip så vidt inn i eksisterande plan Rystefeltet-Osmarka. Berørt areal i vest er regulert til offentleg fri- område og området i aust er regulert til landbruksområde.
To alternativ
Planen er lagt fram i to alternativ. Storleiken på bygga og plasseringa er tilnærma lik, men oppbygginga knytt til vegtilkomsten og leikeplassane er ulike.
– Utbygginga er omfattande, med fleire store bygg. Feltet vil nok verte godt synleg, men bustadområda i bakkant og det skrånande terrenget gjer likevel til at utbygginga glir relativt godt inn i terrenget, kommenterer rådmannen.
Omfanget av utbygginga er stort, og vil føre til ein auke i trafikkbelastninga på Leitevegen. For å betre dei trafikale forholda er det stilt krav til skiltplan på strekninga mellom krysset med Osborgvegen og Osskarelva. Eit mål med dette er å forkøyrsregulere Leitevegen.
Leitevegen grensar mot sørlege plangrense og er regulert som hovudsamleveg med forlenging mot flyplassområdet. Realisering av denne lenginga er no aktualisert. 120 meter nord for planområdet går E39. Sør for Leitevegen bak planområdet ligg Rystefeltet bustad- område – hovudsakleg utbygt med einebustader.
Det vert opparbeidd avkøyrsle/kryss til feltet frå kommunal veg – Leitevegen – i søraustre hjørne av planområdet. Avkøyrsla dimensjonerast for lastebil.
Framtidig areal
Planområdet er i kommunedelplanen for Ørsta sentrum og Hovdebygda sett av til framtidig bustadareal med krav til reguleringsplan. I kommunedelplanen er det ei føring at det skal vere om lag ei 50/50-fordeling mellom konsentrerte einingar og einebustader, men i sentrumsnære område og nær hovudsamleveg skal fortetting prioriterast.
I konsekvensutgreiinga er det ikkje peika på særskilde tema for dette arealet. I dei omkringliggande områda er det peika på stor konflikt med landbruksinteresser. Sidan utbyggingsområdet ligg like inntil Leitevegen kan ein legge til grunn at 100 prosent konsentrerte areal er i samsvar med overordna plan.
Det vert ikkje inngått utbyggingsavtale med kommunen i dette prosjektet.
Planframlegget er utarbeidd i samsvar med overordna plan og i stor grad tilpassa innkomne merknader.
Når det gjeld renovasjon er det lagt opp til nedgravne containerar. Bebuarane slepp altså bosdunkar.
Planutvalet (formannskapet) skal ha oppe saka på neste møte.
