Slik konkluderer lensmann Guttorm Hagen i Ørsta og Volda etter å ha gått gjennom politimeister Ingar Bøen sitt framlegg til framtidig organisering av politiet i fylket.
Som Møre-Nytt skreiv laurdag, foreslår Bøen å behalde lensmannskontoret i Hovdebygda. I første omgang blir det to lensmannskontor på Ytre Søre, men på sikt er det meininga å samlokalisere kontora i Ulsteinvik og på Eggesbønes. Kontoret i Vanylven skal bestå.
– Skal ha kompetanse på fjell og skred
Stranda og Sykkylven
Det mest oppsiktsvekkande med forslaget for vårt område, er forslaget om at Ørsta/Volda og Stranda/Sykkylven skal vere eitt lensmannsdistrikt. Samtidig skal dagens vaktsamarbeid på Søre Sunnmøre bestå.
– Eg ser moglegheiter i meir kontakt innover mot Storfjord-området. Dette vil særleg vere nyttig i samband med større hendingar og i beredskapssamanheng. Vi har personell som har erfaring og kompetanse med naturhendingar, og samarbeid med andre naudetatar og frivillige i samband med større hendingar. Så dette ansvaret trur eg tenestepersonellet i Ørsta og Volda vil ta. Kontoret i Hovdebygda er også sentralt plassert for slik teneste, med nærleik til lufthamna og til viktige samferdselsårar, seier lensmann Hagen.
Politiet på Søre Sunnmøre har i dag døgnkontinuerleg patrulje, gjerne med fleire bilar ute samtidig.
– I Stranda og Sykkylven er det framleis ein del bakvakt eller kvilande vakt. Vi vil kunne sende ein patrulje til Stranda på kort varsel dersom det er behov for det.
– Og det vil ikkje svekke beredskapen på Søre at patruljar reiser til Stranda eller Sykkylven?
– Sidan vi gjerne har fleire patruljar, vil vi kunne halde oppe beredskapen på Søre Sunnmøre i slike situasjonar. Det vil også vere mogleg med bistand frå Ålesund, seier han.
Ein betre veg frå Grodås til Hellesylt vil også betre beredskapen mot Storfjord-området, meiner Hagen.
– Her er det låg standard i dag, og ganske høg trafikk. For utrykkingskøyretøy vil det vere ein stor fordel om han iallfall er brei nok til at han ikkje blir blokkert av store køyretøy.
Framleis samarbeid på Søre
Samtidig ser Hagen det som viktig at dagens vaktsamarbeid på Søre Sunnmøre blir halde oppe og styrka.
– Dette har vi brukt mange år på å bygge opp og det fungerer svært bra. Eg ser fram til å vidareutvikle dette samarbeidet. I det daglege vil Stranda og Sykkylven ha si eiga vaktordning. Det er for stor avstand, særleg til Sykkylven, til at eit fast vaktsamarbeid er tenleg. Ressursane frå Ørsta og Volda vil bli sendt når det er behov for det.
To lensmannskontor
Guttorm Hagen er glad for at lensmannskontoret i Hovdebygda er trygga og truleg får ein styrka posisjon som følgje av reforma.
– Eg tek også poenget med at det synest politisk umogleg med eitt lensmannskontor for heile Søre Sunnmøre.
– Er det fornuftig å halde oppe fleire kontor?
– Eg ser fordelar med det innanfor etterforsking, førebygging og tryggleiksteneste. Innanfor vakt og beredskap skal ressursane flyte rundt etter kvar behovet er. Til dels skal denne flyttinga vere planlagt, og til dels skal ho vere hendingsstyrt. Det viktigaste er at vi har høg kompetanse lokalt, og nok patruljar ute i felten til ei kvar tid.