Ja til Volda og Hornindal

Fylkesmann Anne Karin Hamre i Sogn og Fjordane rår til at Hornindal kommune vert slått saman med Volda kommune.

– Hornindal kommune har sjølve vore tydelege på utfordringane dei har. Dei hadde to retningsval, Stryn eller Volda. Eit fleirtal i kommunestyret sa ja til å slå seg saman med Volda. Dette vil vi respektere, sa fylkesmann Hamre då ho presenterte si tilråding overfor Kommunal- og moderniseringsdepartementet torsdag.

Ho understreka at kommunen Volda/Hornindal vil oppfylle måla som er sette i kommunereforma.

Hamre rådde dessutan til at Vågsøy kommune vart slått saman med Selje kommune, og at Førde, Naustdal, Jølster og Gaular vert ein kommune. Det same gjeld Sogndal, Balestrand og Leikanger.

Fylkesmannen rår førebels til at dei andre kommunane i Nordfjord står åleine, men at dei må ta eit retningsval og bu seg på kommunesamanslåingar seinare. Hamre såg føre seg at Stryn, Eid og Gloppen tek samtalar om kommunesamanslåing.

Måndag skal fylkesmann Lodve Solholm leggje fram si tilråding for Møre og Romsdal. Då vil eitt av spørsmåla vere kor samordna han er med fylkesmannen i Sogn og Fjordane om samanslåing over noverande fylkesgrense.