Mo Sameige vann fram med overskjønn etter naturskadar i 2013, og vil no bruke pengane på å føre elvane ved Mjeltemyrane tilbake i sitt opphavlege løp.
Skjønnsaka etter naturskadane har vore fleire rundar i retten, men for to veker sidan kom overskjønnet frå Søre Sunnmøre tingrett. For ulike naturskadar vart taksten sett til 1.017.450 kroner, men punktet det var usemje mellom Mo Sameige og Naturskadefondet på var gjenopprettinga av elveløpet ved Mjeltemyrane. Lausmassar losna under uvêret i 2013, samla seg og tetta det opphavlege elveløpet.
– Det nye elveløpet har bana seg veg gjennom beitemark, som saman med steingardar og gjerde er skadd, heiter det i skjønnet.
Her gav tingretten Mo Sameige medhald. For å gjenopprette det gamle elveløpet har retten lagt til grunn at det må fjernast masse i ei strekning på 550 meter. Taksering av arbeidet vert sett til 834.750 kroner.
– Den store saka for vår sin del var å få flytta elva tilbake til det opphavlege løpet, og det fekk vi medhald i sist, seier Leif Roar Strand, Line Hansgård, Elias Moe og Sindre Moe frå styret i Mo Sameige.
Sameiget meiner at NVE har endra haldning til førebyggingsarbeid.
– Fram til og med nyttårsorkanen i 1992 hadde NVE ei rolle der dei skulle drive med førebygging. No har vi kome dit at ein kanskje skal reparere etterpå, og at grunneigarar kanskje får naturskadeerstatning.
Sameiget har von om å få rydde opp i elva, og legge elva tilbake i sitt gamle løp.
– Viss vi ikkje får rydda i elva kjem den til å ta med seg grantre som til slutt vert kilt fast i Rossåabrua, og det er fare for at brua vert øydelagt neste gang det er flaum. Dei siste gongane det har tetta seg ved Rossåabrua er det vi som har sagt ifrå slik at det har blitt rydda opp.
Sameiget gir ros til Ørsta kommune som dei meiner har vore på deira side, og kommunen hjelpte grunneigarane med setje verdi på beiteområdet som fekk naturskade.
– Håpet no er at saka stoppar der ho er no. Landbruksdirektoratet kan anke saka til Høgsterett, og klok av skade så jublar vi ikkje enno.
– Vil vere ei teneste for Ørsta sentrum
Sameiget har planar om eit massebasseng i området ved Mjeltemyrane.
– Det er ei ypparleg plassering slik vi ser det, og det er mogleg å tenkje seg eit mobilt knuseverk i området her. Slik som det er no framover Vassdalen og Langedalen er det utruleg med ras. På Rindasletta er den finaste beitesletta, og der ligg det mykje rasmasse. Denne massen finn vegen til elva, og vert ført vidare. Elva har og bygt seg opp og skifta løp. Når elva får nokre flaumar på seg vil den ta med seg massen frå Rindasletta og andre stader gjennom dalen. Massane vil til slutt hamne i sjøen ved Meieriet, men på flata ved Mjeltemyrane vil massen heve terrenget med fleire meter. Vi meiner at med hjelpa frå Naturskadefondet så kan vi gjere ei stor teneste for Ørsta ved å hindre flaum i Ørsta sentrum.
Då uvêret herja i 2013 sette sameiget inn krisetiltak ved Daleteigane for å hindre flaumskade.
– Daleteigane hadde sett ut som Mjeltemyrane i dag om vi ikkje hadde hatt gravemaskina der til som krisetiltak. Dette er eit svært populært turområde for ørstingane, og det er kanskje ikkje alle som tenkjer over at det er grunneigarar som eig grunnen her. Vi har lagt ned mykje arbeid for at dette området kan nyttast, og det er eit området som har stor betydning for mange.
