To personbilar kolliderte på E39 i Furene fredag ettermiddag. Kollisjonen skjedde i krysset til Furene næringsområde. Den eine bilen skulle inn på E39, medan den andre kom køyrande på Europavegen.
Alle naudetatane rykte ut til staden.
Klokka 15.40 melde politiet at det er snakk om mindre personskade, og at bilberging er på veg.
Begge bilførarane vart tekne med til legesjekk etter ulykka. Den eine føraren er mistenkt for å ha brote vikeplikta, og har fått førarkortet beslaglagt av politiet.
– Trafikken glir greit forbi på staden, melde politiet klokka 15.40. Ulykka skjedde midt i rushtrafikken etter arbeidstid, og det vart tett trafikk forbi staden.
Trafikken mot Volda vart dirigert inn i ei omkøyring via Furene næringsområde etter ulykka.
Vegen vart stengd ein kort periode i samband med bilberginga.
Meldinga om ulykka kom like etter klokka 15.30.