Tala frå Statistisk sentralbyrå viser at Ørsta hadde 10.704 innbyggjarar per 31. mars i år. Veksten har kome grunna innflytting, for det var faktisk eit fødselsunderskot i fyrste kvartal.
Det vart fødde 25 born i løpet av dei tre fyrste månadene, medan 26 døydde.
Men det var langt fleire som flytta til Ørsta enn som flytta frå i den same perioden. Tala syner at 96 personar flytta til Ørsta i løpet av dei tre fyrste månadene i år, medan 68 flytta ut. Av desse var det tretten som kom frå utlandet med åtte flytta til utlandet.
Samla gjev dette ein folketalstilvekst på 27 personar i løpet av dei tre fyrste månadene i år.
Volda kommune opplevde ein liten tilbakegang i folketalet i fyrste kvartal. Det var ein minus på åtte personar, og folketalet i Volda var på 9.029 personar per 31. mars.
Det var 37 born som kom til verda i Volda i fyrste kvartal, medan 15 personar døydde. Det gjev eit fødselsoverskot på 22 personar.
Men Volda opplevde ei større utflytting enn innflytting. Det var 106 som flytta til kommunen i løpet av fyrste kvartal, medan 136 flytta frå kommunen. 32 personar flytta til Volda frå utlandet, medan 23 personar flytta til utlandet frå Volda. Samla gjev dette ei nettofråflytting på 30 personar, og til saman ein folketalsnedgang på åtte personar.
Det var fleire kommunar på Søre Sunnmøre som opplevde folketalsnedgang i fyrste kvartal. Ulstein kommune er per 31. mars registrert med eit folketal på 8.418 personar, som er ein nedgang på 12 personar.
Herøy kommune hadde 8.943 innbyggjarar etter fyrste kvartal, og det er ein minus på 29 personar.
Nedgang i folketalet hadde også Vanylven med 25 personar til 3.231 innbyggjarar og Hareid reduserte folketalet med elleve personar til 5.128 per 31. mars.
Møre og Romsdal opplevde ein samla folketalsreduksjon på 109 personar til 265.181 personar.
I nabokommunane sør var det nedgang i folketalet i Hornindal med fem til 1.194, medan Stryn kommune hadde ein vekst med nitten personar til 7.187.
