Onsdag føremiddag kom Jon Georg Dale (Frp) ut på Slottsplassen saman med statsminister Erna Solberg og resten av regjeringa.
Dalsfjordingen er nyutnemnt landbruks- og matminister, og den første statsråden frå Volda eller Ørsta i nyare tid.
Han blir også den yngste statsråden i Regjeringa Solberg, og, etter det Møre-Nytt forstår, den yngste mannlege statsråden nokon gong. Berre Hadia Tajik, som var 29 då ho tok over som kulturminister, har vore yngre.
Dale kjem frå stillinga som statssekretær i Finansdepartementet, der han var vore den høgre handa til finansminister Siv Jensen. Han har tidlegare vore statssekretær i Samferdsledepartementet og politisk rådgivar for stortingsgruppa til Framstegspartiet.
– Han er ein veldig ung mann - berre litt over 30 år - og går for å vere ei komande stjerne i Framstegspartiet, sa Kristin Clemet, leiar for den liberale tankesmia Civita, på Dagsnytt 18 på NRK tysdag.
– Jon Georg Dale har vore ein av Siv Jensens næraste som statssekretær i Finansdepartementet, og blir sett på som ein lojal og dyktig politikar, som har vore ein bakspelar i dei to første åra til regjeringa, sa politisk kommentator Lars Nehru Sand i NRK under statskanalen si direktesending onsdag føremiddag.
Han vart valt inn i kommunestyret i Volda i 2003. Då var han 18 år gammal. Dale har vore både gruppeleiar for Frp i Volda og fylkestingsmedlem.
Dale har fagbrev i kjøtskjering, og er odelsgut på Dale i Dalsfjorden.
Det har vore éin statsråd frå Ørsta/Volda tidlegare, men Jon Georg Dale er den første i nyare tid.
Olav Martinus Knutson Steinnes var kyrkje- og skuleminister i Christopher Hornsrud si arbeidarpartiregjering. Regjeringa fekk under tre veker ved makta, og sat frå 28. januar til 15. februar 1928. Steinnes var fødd og oppvaksen på Ytre Steinnes i Ørsta, men flytta frå bygda i vaksen alder.