Det dårlege vêret siste døgnet har gitt forkjemparane for akuttkirurgien ved Volda sjukehus ein tydeleg argumentasjon mot helseminister Bent Høie.

LES OGSÅ: Folkehav for Volda sjukehus

LES OGSÅ: E39 stengt på grunn av jordras

LES OGSÅ: Opnar vegen fredag ettermiddag

Audhild Gregoriusdotter Rotevatn var berre minutt unna å verte teken av jordraset i Rindane torsdag kveld. På Facebook fredag kjem ho med klar beskjed til Høie:

«Hallo, Bent Høie. Eg passerte rasstaden nokre minutt før raset gjekk i går. Vêret var så dårleg at eg måtte stoppe bilen med naudblink fleire gongar. Vegen er framleis stengd. No er skiltet snart tatt av vêret, det også.

I dag er det 12 varmegrader. Førre helg gjekk vi på ski. Er dette uvanleg? Nei. Sjå på kartet. Vi er ved 62 grader nord. Fjella stangar i himmelen. Landskapet er opprive av fjordar. Ferja på omkøyringsvegen Hareid-Sulesund small inn i kaia i går. Slik er det her.

På vegen møtte eg Widerøe. Ja, Widerøe. Flyselskapet. Buss for fly, heiter det her. Ingen helikopter går. Vegen er stengt. Ferja har problem.

Vi krev tryggleik. Vi krev din respekt. Respekt for liv og helse. Det er vi som bur her. Lytt til veljarane dine. Det kallast demokrati.»