Fredag kl. 09.00 melder Statens vegvesen at desse vegane er stengde i Ørsta/Volda:
E39 ved Liadal grunna jordras.
Fylkesveg 655 ved Lygnstøylvatnet i Norangsdalen grunna jordras.
Fv 40 mellom Folkestad og Dravlaus grunna snøskred ved Fjøsneset.
Beredskap
Ordførar Stein Aam i Ørsta fortel at kommunen er i beredskap, og følgjer situasjonen nøye.
– Vi skjøna torsdag ettermiddag at det kunne kome hendingar, og som beredskapsleiar var eg i telefonisk kontakt både med rådmann og lensmann om saka.
Raset i Rindane med stengd europaveg gjer at elevane i Liadal fredag held seg heime frå skule. Dersom det er behov for heimebasert omsorg i Liadal, vert dette ordna frå Vartdal.
- Vi fekk melding om telefonbrot i Bjørke-området, men elles har det vore stille, seier ordføraren.
Ferjeproblem
Trafikantar som skal til eller frå Ålesund frå Ørsta/Volda har vorte rådde til å køyre om Eiksundsambandet. Men det er problem i sambandet Hareid - Sulesund grunna mykje trafikk, og dermed forseinkingar. C-ferja i sambandet Hareid - Sulesund er dessutan flytta over i eit anna samband.
