– Vi må utøve trykk

– Vi må gløyme partipolitikk og stå samla i denne saka. Dette er ei av dei viktigaste sakene i denne perioden. Helseminister Bent Høie er ein sentral person, men vi må også utøve trykk mot stortingspolitikarane i dei ulike partia, seier Aam.

Det er klart at Høie kjem til Volda sjukehus før jul, og Aam understrekar at det er særs viktig å få fram det faglege i saka overfor helseministeren.

– Det er og viktig at kreftene i Nordfjord og på Ytre vert med i oppropet. I Stryn og Hornindal står dei i kø for å verte inkludert i Volda og Ørsta. Det er avgjerande at vi får fram at føretaksgrensene er til hinder, og dette er ei sak der eg skal stå på barrikadane, seier Aam.

Ordførar i Volda, Jørgen Amdam, er også klar på at det må arbeidast inn mot departementet og sentrale politikarar.

– Møre og Romsdal AP, Volda AP og Ørsta AP har invitert vår fraksjon, inkludert Jonas Gahr Støre, til Volda, og vi forventar at dei andre arbeider på same måte. Det er viktig å oppklare den faktiske feilen med føretaksgrensene, seier Amdam.