I førre veke skreiv Møre-Nytt om at fleire rådgivarbedrifter på Søre Sunnmøre meiner dei blir skvisa på grunn av det store innkjøpssamarbeidet mellom kommunane på Sunnmøre. Kriteria i anbodskonkurransane er så strenge og vidfemnande at små, lokale bedrifter ikkje klarer å oppfylle dei, ifølgje rådgivarverksemdene.

Les også: – Store innkjøp betyr nedbygging lokalt

Samarbeid

– Eg forstår argumenta deira. Likevel har eg og Ørsta kommune stor tru på det lokale næringslivet. Det er fullt ut mogleg for dei å vere med å konkurrere om kontraktar med Ørsta kommune og andre kommunar, seier Fivelstad.

Ho meiner ein av nøklane er samarbeid.

– Om dei samarbeider med nasjonale aktørar eller med kvarandre, stiller dei mykje sterkare i konkurransen. Og så er det viktig å hugse at store innkjøp også gir moglegheit for bedriftene til å vekse og levere tenester til fleire kommunar, argumenterer Fivelstad.

Krev ressursar

Hovudargumentet for store innkjøp er at det gir høve til å presse prisane ned.

– Likevel er det rett at det ikkje er slik at større alltid er billigare. Om vi til dømes kjøper frå eit firma i Ålesund, må leverandørane ta omsyn til frakt og tid når dei gir eit felles anbod.

Det er også fleksibilitet i systemet, slik at Ørsta kommune kan velje vekk nokre innkjøpsavtalar, opplyser Fivelstad.

– Men vi kan likevel ikkje ha for mange små innkjøp. Då blir kostnaden med å ha eigen administrasjon for høg.

I dag har kommunen inntil eit halvt årsverk med ansvar for innkjøp.

– Om vi skulle drive med innkjøpa sjølve, ville vi hatt behov for mange fleire tilsette, seier Fivelstad.

Les også: – Ein del av sentraliseringsbølgja

Næringskontoret

Økonomileiaren ønskjer å gi eit innspel til Ørsta næringskontor, for å få dei til å ta ei større rolle mot bedriftene.

– Eg ser for meg at næringskontoret kan følgje med på kva konkurransar som blir annonserte og sende desse vidare til aktuelle bedrifter. I tillegg er det viktig at lokale bedrifter får god nok kursing i korleis anbodssystemet fungerer i praksis. Det hadde også vore fint om næringskontoret kunne bidra med.