På førehand hadde dei rekna ut at dei kunne ta i mot 200 gjester, og det var trongt i stolradene då konserten vart opna med marsjen "Farvel til en slavisk kvinne".
Korpset har i løpet av sine 70 år aldri vore større enn det var søndag, og dei var om lag 35 musikantar på scena. I tillegg spelte tre av æresmedlemene under nokre av nummera.
- Samfunnshuset har aldri vore så strigla sidan det vart sett opp i 1965, helsa konferansier Odd-Arild Langstøyl til dei mange frammøtte.
Dirigent Arild Andenes hausta også ros for innsatsen sin i hornmusikken. Langstøyl fortalde at han har snakka med fleire av musikantane, som seier at dirigenten har gitt korpset eit stort løft.
- Han får folk til å løfte seg. Han utfordrar grensene til folk og får dei til å verte betre. Det gjer at folk veks.
Og dirigenten sjølv var mektig stolt over innsatsen til Follestaddal hornmusikk.
- Eg tør påstå at eg av og til kjenner det som at eg er forelska i korpset mitt, fortel han glad.
Publikum let seg også begeistre. Alf Foldal er imponert.
- Det er noko anna enn den tida eg var med og spelte, seier han.