Torsdag brakar det laust for det nittande kulturtorget i Molde. I løpet av to dagar skal 30 ulike produksjonar avviklast på Bjørnsonhuset og Plassen i Molde. Kulturtorget har 600 deltakarar til saman.

Rapgruppa Side Brok står for eitt av innslaga. Også sunnmøringane Maria Parr (forfattar), Are Pilskog (filmskapar) og Ingunn Røyset (forfattar) er med.

- Årets program har fokus på vår regionale kulturarv gjennom kystkultur, båttradisjonar, handverk og dei eldgamle forteljingane om dei store spørsmåla i livet. Deltakarane vil også få dagsaktuelle produksjonar som film om dronekrig og eit møte med forfattar og samfunnsdebattant Amal Aden, seier seksjonsleiar Johild Kosberg Bredin.

Det er Møre og Romsdal fylkeskommune som står bak arrangementet, og som  inviterer kommunar, skolar, kulturinstitusjonar og profesjonelle kunstnarar til  to dagar med Kulturtorg. Produksjonane er laga for barn og ungdom og skal turnere i Kultursekken i fylket komande skoleår.  Kultursekken tilbyr kulturell eigenaktivitet og opplevingar for elevane i grunnskole og videregåande skole. I Møre og Romsdal får 43 000 elevar tilbod gjennom Kultursekken som er levert av Møre og Romsdal fylkeskommune.