Det fortel rektor Brynhild Barstad etter at Ørsta kulturskule no er i gang med eit nytt skuleår.
Medan det tidlegare har vore dels lange ventelister for nokre av instrumenta på kulturskulen, er ikkje situasjonen no slik. Per i dag er det ledige plassar på piano, gitar, fløyte, klarinett, fiolin og massing.
– Det er berre å ta kontakt dersom nokre er interesserte i opplæring på eit av desse instrumenta. Vi opererer etter først til mølla-prinsippet, fortel rektoren.
Korgruppe
Kulturskulen skal også starte korgruppe, og alle som likar å synge er velkomne.
219 elevar er per i dag tilknytt kulturskulen. På det meste har 290 personar vore tilknytt skulen, inkludert babyane på babysong. Kulturskulen har både individuell undervisning og undervisning i grupper, der eit stort mangfald av sjangrar og instrument ligg i botnen på tilboda.
Det er ein generell trend i fylket at kulturskulane har noko lågare oppslutnad enn før.
– For Ørsta sin del er det nok fleire årsaker. Etter at nivået på kontingenten gjekk kraftig opp, fekk vi eit ganske stort fråfall. I fjor løyvde politikarane pengar slik at kontingenten kunne reduserast ein del. Men framleis vert han kanskje opplevd som høg for nokre, vurderer rektor Barstad. Ho konstaterer at det tek tid å byggje opp att ein større elevmasse.
I tillegg ser ho ein tendens:
– Ein del unge ser ut til ikkje å ville bitte seg som før, i vårt tilfelle for eit heilt år på kulturskulen.
Satsinga på den klassiske opplæringa vil alltid vere viktig for kulturskulen, og utgjere ein solid grunnbasis for tilbodet.
– Samtidig er det viktig å halde oss til ungdomskulturen. Og satsinga på rockekonsertar er ein lekk i dette, og denne satsinga er populær. Vi har 2–3 rockekonsertar i året.
Budsjett
Neste års kommunebudsjett kjem snart. Barstad har ei bøn:
– Den store draumen min no er å få arbeidsro slik at vi får byggje opp dei gode tilboda til å verte endå betre. Dette krev føreseielege forhold, og ein må unngå ein ny diskusjon om årskontingenten, seier Brynhild Barstad.