– Eg vert både rørt og litt flau nesten. Der sit eg i mitt vesle studio og målar, og så driv de på her, på frivillig basis, står på og ordnar for at eg skal få vise fram bilda mine. Det er utruleg hyggeleg!

Åse Marie Thon og Synnøve Foldal Vatne opna utstillinga med vakre stykke framført på klarinett saman med musikklærar Agnete Teige.

– Det der var ei oppleving, helsa kunstnaren, og rosa kulturskuleelevane og Teige opp i skyene.

– Du er ei perle!

Kyr og fuglar

Det var trongt om plassen og mange lovord i kunsthuset. Gunilla har fuglar og kyr med menneskelege eigenskapar som hovudingrediens i bilda sine, og det gjekk rett heim hos dei som kom på utstillinga. Før dagen var omme, var 11 bilde selde, og framleis er det fleire dagar att før utstillinga er over, 10. februar.

Titlar som «Duekos», «Hjerterom», «Slektstreff», «Jeg liker deg», «Nå var det godt med en klem», «Høypåpæra-ørn» og «Høst, ass!» gjenspeglar det kvardagslege og gode Gunilla vil formidle med bilda sine.

Ho har jobba som kunstnar på heiltid sidan 2003, med base i Vestfold, og har via kunsten også vorte ein ihuga forkjempar for miljøet.

Redd for fuglane

– Då eg byrja å måle fuglar kjøpte eg meg ulike fuglebøker. Så melde eg meg inn i ornitologforeininga og abonnerer på ulike fugleblad. Og gjennom dette arbeidet har eg skjønt at det ikkje går så bra med fuglane våre som eg trudde. Ein av tre artar er i ferd med å døy ut. Det er nesten slik at eg vert deprimert av å høyre om det. Det er mange årsaker til dette - alt frå klima, miljøgifter og fangst. Vi er flinke til å mate fuglane i Noreg, men kan vi gjere meir? Det har i alle fall vorte klart for meg at vi treng både blomsterenger og økologisk jordbruk, for at fuglane skal ha nok mat. Utan sprøytemiddel får vi insekt, og då får fuglane mat, fortalde ho engasjert, og la også inn eit godt ord for havet og livet der.

– Det er ikkje så lenge sidan eg lærte meg at det å vaske fleecegenserar i vaskemaskin tilfører havet mikroplast. 35 prosent av mikroplasten i havet kjem frå klesvasken vår, tenk det! Møkkete klede er naturvern i praksis! Eller du kan kjøpe vaskebag som fangar opp mikroplasten. Reine klede, reint hav og reint samvit, fortalde kunstnaren engasjert, og måtte også innrømme at ho sleit med noko dårleg samvit over å ha brukt bilen for å kome seg til Ørsta.

– Eg vert så engasjert i dette, at det nesten vert for mykje, men kanskje kan vi alle bidra litt, slik at ting kan verte betre, oppmoda ho.

Anne Ellingsen frå Volda og Ørsta kunstlag trur utstillinga og bilda til Gunilla apellerer til mange.

– Vi er heldige som har fått Gunilla hit. Mange vert gripne av uttrykka i bilda hennar, og med kyr og fuglar med menneskelege eigenskapar, kan det knapt verte betre, helsa ho då ho opna utstillinga.