Den femte utgåva av Sommarljom vert arrangert frå 27. juli til og med 30. juli. I år som i fjor vert festivalen over fire dagar, og aktivitetane er sentrert til Ørsta sentrum.
– Vi kjem til ha ein kveld i eit naust i Bogafjøra, ein kveld på Hotell Ivar Aasen og ein kveld i Kunsthuset. Vi prøver å bruke ulike lokale i Ørsta, og det er ei blanding av tilreisande og lokale artistar som står på konsertprogrammet, seier Ellingsen.
Ine Hoem, indiebandet Girls, strykekvartetten Oslo Strings som og vart nytta i seriesuksessen Skam, Austestad, Stig Ulv, Erlend Slettevoll trio og Torkjel Bruland Lavoll er nokre av artistane som vert å sjå under Sommarljom i år.
– Her skal vere noko for kvar og ein smak, og det er ei god blanding av jazz, pop, akustisk og klassisk musikk.
I fjor vart det arrangert musikkverkstad under festivalen, og det vart ein stor suksess.
– Nytt i år er at det blir ein eigen familiekonsert retta mot barn, i tillegg til musikkverkstaden for barn. Familiekonserten vert med Løkki som har vore nominert til Spellemannsprisen i kategorien barnemusikk. Både familiekonserten og musikkverkstaden vert på Kunsthuset. Musikkverkstaden var svært populær i fjor, og det kom endå fleire enn vi hadde tenkt.
Sommarljom vart arrangert som todagarsfestival for fyrste gong sommaren 2013, men festivalen er ei forlenging av sommarkonsertar som har blitt arrangert i Ørsta sidan 2011. Firedagarsfestivalen har fått rotfeste og er i vekst.
– Vi har vore veldig nøgde med publikumstala. Vi er framleis ein liten festival, men det har vore bra auke i talet på besøkande. Ordet spreier seg og det er fleire som spør og er interessert i festivalen no enn for nokre år tilbake.
Særpreget til Sommarljom er intime og akustiske konsertar.
– Dette vil vi halde på. Difor vil vi aldri få eit kjempestort publikum, men vi ønskjer eit stort publikum i tråd med våre formidlingstanke, seier Ellingsen.
Arrangørane bak Sommarljom ser no at dei når publikum utanfor Ørsta og Volda.
– Festivalen er i stor grad basert på dugnad og vi held på fordi vi tykkjer det er kjekt. Oppmodinga vår er å ta del. Her er truleg artistar som ein del kjenner og nye artistar publikum kan få mykje glede av.
