Bakketunet opnar igjen

Drivar av Bakketunet på Bjørke, Marita Bett Aakre, melde i fjor at ho no ville stenge dørene for publikum i det verneverdige tunet, grunna anna arbeid.

Bakketunet: Bakketunet på Bjørke hadde sin siste heile sesong i fjor sommar. I år opnar dei likevel tunet for besøkande, delar av sommaren. Arkiv  Foto: Janne-Marit Myklebust

Kultur

No melder Bakketunet på sine heimesider at dei likevel vil halde ope delar av sommaren 2017.

– Vi ønskjer godt nytt år med nyvøla fjøs og nyheita om at vi kjem til å ha ope kvar søndag i heile juli, står det på sida.

Utstilling og kafé

I løpet av juli vil det verte ei hovudutstilling i kufjøset, skiftande handverksutstillingar i kammerset, stabburet og sauefjøset. Det vert enkel kafé og matservering slik som tidlegare år.

– I tillegg kjem vi til å ta imot grupper med eigne aktivitetar og tilbod om matservering gjennom heile sommaren. Nytt av i år er at det vert mogleg for organisasjonar og private aktørar å leige tunet til arrangement i månadane juni og august. Vi kan blant anna avsløre at det kjem til å verteNorrøn Urkraftworkshop i august. Den nye driftsforma vil forhåpentlegvis gi oss som bur i tunet litt meir fridom og sommarferiekjensle, står det å lese på heimesida.