Det går fram av rådmann Wenche Solheim sitt forslag til ny økonomiplan for Ørsta kommune. Planen skal til politisk handsaming i formannskapet i Ørsta komande tysdag.

– Ei satsing på fleirbrukshall, symjehall, bustad- og næringsareal skal auke attraktiviteten til Ørsta kommune og medverke til auka bulyst. Kvar einskild investering i økonomiplanperioden bør likevel verte vurdert mot om investeringa er berekraftig, kommenterer rådmannen.

Ho legg i den komande fireårsperioden opp til stramme driftsbudsjett, og med ein auke i eigedomsskatten mot slutten av økonomiplanperioden. Det vert foreslått å auke eigedomsskatten med ein promille i 2019 og ytterlegare ein promille i 2020.

Investeringane

1.031.433.000 kroner, altså over ein milliard, er foreslått til investeringar i perioden fram til og med 2020.

Det er m.a. sett av 145 millionar kroner til fleirbrukshallen på Utstillingsplassen. Femten millionar kroner er alt sett av for inneverande år.

Vidare vert det sett av 200 millionar kroner til ny symjehall. Her skal den fyrste løyvinga til bygging kome i 2018 med 75 millionar kroner.50 millionar kroner er sett av til legesenter og omsorgsbustader på Bakk-Ola-marka. Det kjem i tillegg til 23,4 millionar kroner som er løyvd i år.

Det er sett av 186 millionar kroner til rehabilitering og nybygg i skulesektoren, og Kvitveisen barnehage får nybygg til 20 millionar kroner. Det skal brukast 27 millionar kroner til å byggje ut næringsområdet på Melsgjerdet, og det skal brukast 11 millionar kroner til nytt næringsareal i Hovdebygda. 24,3 millionar kroner er sett av til å utvide Øvre Mo-bustadfeltet.

Det er også sett av 8,5 millionar kroner til å ruste opp Ørsta kulturhus.

Gjelda aukar

Med alle desse investeringane er det også klart at lånegjelda til Ørsta kommune vil auke mykje. Låna vil auke med 797 millionar kroner i perioden, og det er ei dobling av lånemengda Ørsta kommune har per i dag.

– Med auka utgifter til renter og avdrag, vil det medføre auka eigedomsskatt, kommenterer rådmannen.

Drifta

Rådmannen er klar på at det vert eit stramt opplegg for drifta dei komande åra. Medan kommunen i fjor hadde eit netto driftsresultat på 44,4 prosent, vil dette i planperioden fram til 2020 gå over til minus. For å få drifta til å gå opp, vil det verte brukt midlar frå disposisjonsfondet med i alt 40,8 millionar kroner.

Ramma for drifta vert redusert med ein prosent i økonomiplanperioden.

– Vi skal glede oss over eit godt resultat for 2015, men økonomien til Ørsta kommune er ikkje friskmeld. Vi hadde eit rekneskapsmessig mindreforbruk på drifta i 2015 på tretti millionar kroner. Det vil seie at då vi starta på 2016, hadde vil om lag femti millionar kroner på disposisjonsfond. Året i år er eit «kvileskjær». I den nye økonomiplanen må vi rigge oss for store investeringar og nedgang i rammene, kommenterer rådmannen.

Ei av dei store utfordringane for Ørsta kommune, er endringane i folkesetnaden med stadig fleire eldre. Det er ikkje teke høgde for om dette vil påverke fordelinga av midlar mellom dei ymse seksjonane i kommunen. I staden vert det satsa på helsefremjande investeringar.

– Tida er inne til å ta store løft, samstundes som at fokus på kvalitet, leiing og effektiv drift må oppretthaldast, konkluderer rådmannen med.